Tal como denunciemos en múltiples ocasiones dende Ecoloxistes n'Aición d'Asturies, el cambéu del escenariu enerxéticu español, fai que los promotores de centrales tean faciendo tou lo posible pa dar en retirar los avales depositaos, pa nun perder dineru de manera gratuita. Esto ye frutu de l'almaresía nel apueste pol gas, que fixo qu'a principios de 2005 el Ministeriu d'Industria estableciera la obligación de depositar un aval equivalente al 2% del costu del proyectu en toes aquelles centrales que taba tramitando la Declaración d'Impactu Ambiental (DIA) [1]

Agora, na situación qu'atopamos, col preciu internacional del gas natural creciendo en paralelu col del petróleu y la demanda d'eletricidá, que primero se ralentiza, depués, por efectu de la crisis, llega a cayer abruptamente, y, agora, con una crecedera moderada, fai que les centrales qu'ayeri fueron un suañu pa los sos promotores güei sían una tarrecible velea. Asina, colos datos de REE pal 2010, los 25.220 MW de centrales d'esti tipu esistentes namá producieron 65 Terawatios.hora (TWh), ye dicir un casi un 18 % menos que l'añu anterior. Funcionando por tanto, de media, unes 2.600 hores-equivalentes (HE), cuando la so rentabilidá esixía que lo fixeren percima de 5.000. Ante esta situación nun ye estrañu que nun s'empecipió la construcción de munches centrales que cunten con tolos requisitos alministrativos, o que se ralentizara abruptamente la construcción de les yá empecipiaes.

En realidá, lo que ta asocediendo, según la última información disponible, ye que, los promotores de centrales tán faciendo tou lo posible pa dar en retirar los avales depositaos pa nun perder dineru de manera gratuita y, teniendo en cuenta que'l decretu del aval establecía qu'esti perdería si el promotores arrenunciaben voluntariamente del proyectu, basta que cualquier alministración pongan cualesquier torga por que la presenten ante'l Ministeriu y pidan la devolución. Nuna recién respuesta parlamentaria a la Diputada de ICV, Nuria Bonaventura, el Gobiernu indicaba que 17 centrales, que totalizan más de de 14.000 MW dieren en retirar l'aval hasta ochobre del añu pasáu y prevese que delles más lo faigan nel futuru próximu.

Nel documentu, podemos reparar que, ente la relación de proyectos que recuperaron l'aval, namá un pequenu grupu de cinco centrales, recuperar al llograr el Resolvimientu d'Autorización Alministrativa, este ye'l casu de la central de Corvera, y que podría siguir alantre col proyectu, otros, como los de HC en Badajoz lu retiren al haber un resolvimientu de denegación por tener una Autorización Ambiental Integrada Desfavorable, mientra que, de los proyectos de HC p'Aboño, al presentalos como dos posibles, el 3, 4 o 5 de ciclu combináu o unu de Carbón Supercrítico, podría retirar unu d'ellos cuando la decisión sía firme. La situación más clara ye la de Lada 5, onde Iberdrola abandonu'l proyectu y recuperáu l'aval, «ante la imposibilidá d'evacuación d'enerxía a la rede de tresporte per informe de viabilidá d'accesu desfavorable emitíu por REE»

Notas

[1] En xunetu de 2006, la situación presentaba un escenariu con 36 DIA positives pa centrales que totalizaban una potencia averada de 36.000 MW, 37 proyectos más, una decena d'ellos en Asturies, con una potencia de casi 31.000 MW y que depositaron el correspondiente aval, y, como prueba del escesu de solicitúes, 43 proyectos arrenunciaron a faelo.